Threads of time...

Mein hun ek chhota sa insaan
chhote chhote mere armaan
chahe jindagi ke chu lu asmaan
hun mein ek chhota sa insaan

Unmukt parindon ki manind
jahan chahun wahan jaaun
gulab ki adhkhili kopal jaise
kissi ke ansoon meim muskuraun

Mandir banu to kahin madhushala
har dil mein har pal ullahas jagaun
na ho koi gair, na hi kissi se bair
dilon mein jiyu aur dilon mein so jaaun

Tan ,mann , dhan ki itni punji kamaun
khud khaun,sabko khilaun, jo bache
woh aane wali pidiyon ke liye chor jaaun
rota hua aaya tha hansta hansata jaaun

Shohrat ki nahin koi lalsa mujhko
bas kissi ka mann na dukhaaun
ho sakey to yeh var de prabhu
ki jiyun khul ke marne se pehle
aur kuch yaadein chhor jaaun

Jab beh nikle ansooan ki koi phuhar
ek ek katrey mein firse muskuraaun
ruke nahin jindagi ka behta jharna
maruun to tere sagar mein mil jaaun

Mein hun ek chhota sa insaan
chhote chhote se mere armaan
naam chehra chahe mitt jaaye
tara ban asmaan mein jagmagaun
jab bhi dekhun wahan se dharti par
sabko hansta khelta khushhaal hi paaun.

Labels: Armaan..